ਇਕ ਦਿਨ ਐਂਵੇ ਹੀ ਯੂ ਟਿਉਬ ਦੀ ਫਰੋਲਾ ਫਰਾਲੀ ਕਰਦਿਆਂ ਇਕ ਵਿਡੀਉ ਸਾਹਮਣੇ ਆ ਗਈ 'ਬਿੱਲੋ'। ਸ਼ਰਾਰਤੀ ਜਿਹਾ ਗੀਤ, 'ਬਿੱਲੋ ਨੀ ਤੇਰਾ ਲੱਕ ਪਤਲਾ ਘੜਾ ਚੁੱਕਿਆ ਢਾਕ 'ਤੇ ਭਾਰਾ'ਗੀਤ ਸਣਿਆ ਤਾਂ ਉਸ ਗਾਇਕ ਦੀ ਪੁਰ ਕਸ਼ਿਸ਼ ਅਵਾਜ਼ ਦੇ ਮੈਨੂੰ ਮਜ਼ਬੂਰ ਕਰ ਦਿੱਤਾ ਕਿ ਮੈਂ ਉਸ ਦੇ ਹੋਰ ਗੀਤ ਵੀ ਸੁਣਾ। ਜਦੋਂ ਹੋਰ ਗੀਤ ਸਰਚ ਕੀਤੇ ਤਾਂ ਗੀਤ ਸੁਦੇਸ਼ ਕੁਮਾਰੀ ਨਾਲ ਬਹੁਤ ਹੀ ਖੂਬਸੁਰਤ ਜਿਹਾ ਦੋਗਾਣਾ ਸੀ, 'ਵੇਟ ਕਰ ਵੇਟ ਕਾਹਤੋਂ ਕਰਦੀ ਏਂ ਕਾਹਲੀਆਂ' ਉਸ ਗਾਇਕ ਨੂੰ ਹੋਰ ਉੱਚ ਪੱਧਰ ਤੱਕ ਲਿਜਾਂਦਾ ਸੀ। ਉਸ ਤੋਂ ਅਗਲਾ ਗੀਤ 'ਛੇਤੀ ਆ ਜਾ ਲੰਡਨੋ ਜਹਾਜ ਚੜ੍ਹ ਕੇ' ਇਕ ਵੱਖਰੀ ਵੰਨ੍ਹਗੀ ਸੁਣ ਕੇ ਉਸ ਗਾਇਕ ਨਾਲ ਸੰਪਰਕ ਕਰੇ ਬਿਨਾ ਰਹਿ ਨਾ ਸਕਿਆ। ਇਟਲੀ ਦੇ ਸ਼ਹਿਰ ਮੇਦੋਨਾ ਬੈਠੇ ਜਦੋਂ ਉਸ ਗਾਇਕ ਅਵਤਾਰ ਰੰਧਾਵਾ ਨਾਲ ਫੋਨ 'ਤੇ ਗੱਲ ਹੋਈ ਤਾਂ ਉਸ ਦੀ ਅਵਾਜ਼ ਹੋਰ ਵੀ ਮਿੱਠੀ ਤੇ ਗੱਲਾਂ ਉਸਦੀ ਗਾਇਕੀ ਨਾਲੋਂ ਵੀ ਸੁਰਿਲੀਆਂ ਲੱਗੀਆਂ। ਆਓ ਕੰਨਾਂ ਵਿਚ ਮਿਸਰੀ ਘੋਲਣ ਵਾਲੇ ਉਸ ਕਲਾਕਾਰ ਨਾਲ ਹੋਈ ਇਕ ਗੱਲਬਾਤ ਵਿਚ ਤੁਹਾਨੂੰ ਵੀ ਸ਼ਰੀਕ ਕਰੀਏ:
ਸਵਾਲ: ਰੰਧਾਵਾ ਸਾਹਿਬ ਆਪਣੇ ਜਨਮ ਅਤੇ ਬਚਪਨ ਬਾਰੇ ਦੱਸੋ?
ਜਵਾਬ: ਬਾਈ ਬਲਰਾਜ, ਮੇਰਾ ਜਨਮ ਪਿੰਡ ਲਟੌਰ ਜ਼ਿਲ੍ਹਾ ਫਤਿਹਗੜ੍ਹ ਸਾਹਿਬ ਵਿਚ ਹੋਇਆ ਹੈ। ਇਥੇ ਹੀ ਮੇਰਾ ਬਚਪਨ ਬੀਤਿਆ ਹੈ।
ਸਵਾਲ: ਗਾਇਕੀ ਦੀ ਆਰੰਭਤਾ ਕਦੋਂ ਹੋਈ?
ਜਵਾਬ: ਗਾਉਣ ਦੀ ਸ਼ੁਰਆਤ ਬਚਪਨ ਤੋਂ ਹੀ ਸਕੂਲ ਦੀਆਂ ਬਾਲ ਸਭਾਵਾਂ ਤੋਂ ਸ਼ੁਰੂ ਹੋ ਗਈ ਸੀ ਤੇ ਪਹਿਲੀ ਵਾਰ ਮੈਂ ਛੇਵੀਂ ਵਿਚ ਪੜ੍ਹਦਿਆਂ ਸਟੇਜ ਤੋਂ ਗਾਇਆ ਸੀ।
ਸਵਾਲ: ਤੁਸੀਂ ਕਿਸ ਦੀ ਗਾਇਕੀ ਤੋਂ ਪ੍ਰਭਵਿਤ ਹੋ?
ਜਵਾਬ: ਕੁਲਦੀਪ ਮਾਣਕ, ਸੁਰਿੰਦਰ ਸ਼ਿੰਦਾ ਅਤੇ ਸਵ: ਸੁਰਜੀਤ ਬਿੰਦਰਖੀਆ ਜੀ ਦੀ ਗਾਇਕੀ ਮੈਨੂੰ ਬਹੁਤ ਪਸੰਦ ਹੈ।
ਸਵਾਲ: ਸੰਗੀਤ ਦੀ ਕੋਈ ਬਕਾਇਦਾ ਸਿੱਖਿਆ ਵੀ ਲਈ ਹੈ?
ਜਵਾਬ:ਕਾਲਜ ਪੜ੍ਹ ਸਮੇਂ ਮਿਉਜ਼ਿਕ ਦਾ ਸਬਜੈਕਟ ਲਿਆ ਸੀ, ਪਰ ਅਫਸੋਸ ਪੜ੍ਹਾਈ ਪੂਰੀ ਨਹੀਂ ਕਰ ਸਕਿਆ ਤੇ ਅੱਧਵਾਟੇ ਛੱਡ ਕੇ ਵਿਦੇਸ਼ ਆ ਗਿਆ। ਵੈਸੇ ਕਾਲਜ ਸਮੇਂ ਦੌਰਾਨ ਸਵ: ਚਰਨ ਸਿੰਘ ਗਿੱਲ ਤੇ ਸਾਧੂ ਸਿੰਘ ਹੋਰਾਂ ਤੋਂ ਕਾਫੀ ਕੁਝ ਸਿੱਖਦਾ ਰਿਹਾ ਹਾਂ।
ਸਵਾਲ: ਕੀ ਪਰਿਵਾਰ ਵਿਚ ਕੋਈ ਹੋਰ ਵੀ ਗਾਉਂਦਾ ਸੀ ਤੇ ਪਰਿਵਾਰ ਤੋਂ ਤੁਹਾਨੂੰ ਇਸ ਖੇਤਰ ਵਿਚ ਕਿਹੋ ਜਿਹਾ ਹੁੰਗਾਰਾ ਮਿਲਿਆ।
ਜਵਾਬ: ਨਹੀਂ ਜੀ ਪਰਿਵਾਰ ਵਿਚ ਕਿਸੇ ਨੂੰ ਗਾਉਣ ਦਾ ਸ਼ੌਂਕ ਨਹੀਂ ਸੀ। ਘਰਦਿਆਂ ਵੱਲੋਂ ਕੋਈ ਵਿਸ਼ੇਸ਼ ਸਹਿਯੋਗ ਵੀ ਨਹੀਂ ਮਿਲਿਆ ਤੇ ਨਾ ਹੀ ਕੋਈ ਵਿਰੋਧ ਹੋਇਆ ਹੈ।
ਸਵਾਲ: ਪਹਿਲੀ ਐਲਬਮ 'ਬਿੱਲੋ' ਕਰਨ ਦਾ ਤਜ਼ਰਬਾ ਕਿਹੋ ਜਿਹਾ ਸੀ?
ਜਵਾਬ: ਪਹਿਲੀ ਐਲਬਮ ਦਾ ਤਜ਼ਰਬਾ ਬਹੁਤ ਵਧੀਆ ਸੀ, ਕਿਉਂਕਿ ਹਰਵਿੰਦਰ ਉੜਪੁਰੀ ਤੇ ਅਸ਼ੋਕ ਸ਼ਰਮਾ ਪਹਿਲਾਂ ਹੀ ਇਸ ਖੇਤਰ ਵਿਚ ਸਨ। ਉਹਨਾਂ ਨੇ ਮੇਰੀ ਕਾਫੀ ਸਹਾਇਤਾ ਕੀਤੀ।
ਸਵਾਲ: ਤੁਸੀਂ ਕਿੰਨਾ ਕਿੰਨਾ ਗੀਤਕਾਰਾਂ ਦੇ ਗੀਤ ਗਾਏ ਹਨ?
ਜਵਾਬ: ਹਰਵਿੰਦਰ ਓੜਪੁਰੀ, ਪ੍ਰੀਤ ਨੰਗਲ, ਚੰਨੀ ਫਰਾਂਸ, ਬਿੰਦਰ ਨਵੇਂਪਿੰਡੀਆ ਤੇ ਆਉਣ ਵਾਲੇ ਸਮੇਂ ਵਿਚ ਤਰਸੇਮ ਜਲਾਲ ਪੁਰੀ ਤੇ ਬਲਰਾਜ ਸਿੱਧੂ ਦੇ ਗੀਤਾਂ ਦੀ ਤਿਆਰੀ ਚੱਲ ਰਹੀ ਹੈ।
ਸਵਾਲ: ਗਾਇਕੀ ਤੋਂ ਇਲਾਵਾ ਹੋਰ ਕੀ ਕੀ ਸ਼ੌਂਕ ਪਾਲੇ ਹਨ?
ਜਵਾਬ: ਗਾਇਕੀ ਤੋਂ ਇਲਾਵਾ ਥੇਇਟਰ ਤੇ ਐਕਟਿੰਗ ਦਾ ਸ਼ੌਂਕ ਹੈ। ਸਟੇਜ ਪਲੇਅ ਵਿਚ ਪੰਜਾਬੀ ਯੁਨੀਵਰਸਿਟੀ ਵੱਲੋਂ ਸਿਲਵਰ ਮੈਡਲ ਮਿਲ ਚੁਕਿਆ ਹੈ।
ਸਵਾਲ: ਕੋਈ ਯਾਦਗਾਰੀ ਪਲ ਜਾਂ ਘਟਨਾ ਜੋ ਸਿਮਰਤੀਆਂ ਦੇ ਪਟ 'ਤੇ ਸ਼ਿਲਾਲੇਖ ਬਣ ਗਈ ਹੋਵੇ?
ਜਵਾਬ: ਯੂਥ ਫੈਸਟੀਵਲ ਤੋਂ ਦੋ ਦਿਨ ਪਹਿਲਾਂ ਇਕ ਸਟੇਜ ਪਲੇਅ ਦੌਰਾਨ ਪਾਲਿਸ ਵਾਲਾ ਦਾ ਰੋਲ ਕਰਦਿਆਂ ਮੈਂ ਇਕ ਸਾਥੀ ਨੂੰ ਧੱਕਾ ਮਾਰਨਾ ਸੀ। ਮੈਥੋਂ ਧੱਕਾ ਐਨੀ ਜ਼ੋਰ ਦੀ ਵੱਜ ਗਿਆ ਕਿ ਡਿੱਗ ਕੇ ਉਸ ਵਿਚਾਰੇ ਦੀ ਬਾਂਹ ਟੁੱਟ ਗਈ। ਪਰ ਉਹ ਦਰਦ ਦੇ ਬਾਵਜੂਦ ਵੀ ਪਲੇਅ ਕਰਦਾ ਰਿਹਾ ਤੇ ਅੰਤ ਬੇਹੋਸ਼ ਹੋ ਗਿਆ। ਮੈਂ ਇਹ ਦ੍ਰਿਸ਼ ਦੇਖ ਕੇ ਕਾਫੀ ਡਰ ਗਿਆ। ਦੋ ਦਿਨਾਂ ਵਿਚ ਉਸ ਦੀ ਜਗ੍ਹਾਂ ਕਿਸੇ ਹੋਰ ਤਿਆਰ ਕੀਤਾ ਤੇ ਅਸੀਂ ਮੁਕਾਬਲਾ ਜਿੱਤ ਗਏ। ਪਰ ਮੈਨੂੰ ਅੱਜ ਤੱਕ ਉਸਦਾ ਅਫਸੋਸ ਹੈ ਕਿ ਮੇਰੇ ਵਜ੍ਹਾ ਕਾਰਨ ਮੇਰਾ ਉਹ ਸਾਥੀ ਪਰਫੌਰਮ ਨਹੀਂ ਕਰ ਸਕਿਆ।
ਸਵਾਲ: ਅੰਤ ਵਿਚ ਪਾਠਕਾਂ ਨੂੰ ਕੀ ਕਹਿਣਾ ਚਾਹੋਗੇ?
ਜਵਾਬ: ਮੈਂ ਤਾਂ ਐਨਾ ਹੀ ਕਹਿਣਾ ਚਾਹਾਂਗਾ ਕਿ ਸਾਡੀ ਮਿਉਜ਼ਿਕ ਅੰਡਸਟਰੀ ਨੂੰ ਪਾਇਰਸੀ ਦੀ ਬਹੁਤ ਮਾਰ ਪੈ ਰਹੀ ਹੈ। ਕਲਕਾਰ ਐਨੀ ਮਿਹਨਤ ਕਰਕੇ ਐਲਬਮ ਤਿਆਰ ਕਰਦਾ ਹੈ ਤੇ ਇਸ ਕੰਮ ਲਈ ਪੈਸਿਆਂ ਦੇ ਢੇਰਾਂ ਦੇ ਢੇਰ ਖਰਚ ਆਉਂਦੇ ਹਨ। ਪਰ ਪਾਇਰਸੀ ਵਾਲੇ ਸਾਡੀ ਸਾਰੀ ਮਿਹਨਤ ਮਿੰਟਾਂ ਵਿਚ ਹੂੰਝ ਕੇ ਲੈ ਜਾਂਦੇ ਹਨ। ਅਗਰ ਅਸੀਂ ਸਾਰੇ ਇਹ ਪ੍ਰਣ ਕਰ ਲਈਏ ਕਿ ਅਸਲੀ ਮਿਉਜ਼ਿਕ ਸੀ. ਡੀ. ਲੈ ਕੇ ਸੁਣਨੀ ਹੈ ਤਾਂ ਸਾਡੇ ਕਲਾਕਾਰ ਜਿਉਂਦੇ ਰਹਿ ਸਕਦੇ ਹਨ।
